మూడు మండలాలను కరువు మండలాలుగా ప్రకటించాలి: మంత్రి పొన్నం ప్రభాకర్

వర్షాభావ పరిస్థితులు ఇలాగే కొనసాగితే రానున్న రోజుల్లో సాగునీటితో పాటు తాగునీటి సమస్యలు కూడా తలెత్తే ప్రమాదం ఉందని మంత్రి ఆందోళన వ్యక్తం చేశారు. గ్రామీణ ప్రాంతాల్లో ప్రజలు, రైతులు ఇప్పటికే అనేక ఇబ్బందులు ఎదుర్కొంటున్నారని, పరిస్థితిని ముందుగానే అంచనా వేసి ప్రభుత్వం తగిన చర్యలు తీసుకోవాల్సిన అవసరం ఉందని ముఖ్యమంత్రి దృష్టికి తీసుకెళ్లారు. హుస్నాబాద్ నియోజకవర్గ పరిధిలో మొత్తం ఏడు మండలాలు ఉండగా, ఇప్పటికే రెండు మండలాలను మాత్రమే కరువు మండలాలుగా గుర్తించారని మంత్రి పేర్కొన్నారు. అయితే మిగిలిన మండలాల్లో కూడా వర్షాభావ పరిస్థితులు తీవ్రంగా ఉన్నాయని, ముఖ్యంగా జిల్లా పరిధిలోని హుస్నాబాద్, కోహెడ, అక్కన్నపేట మండలాల్లో రైతులు, ప్రజలు తీవ్ర ఇబ్బందులు పడుతున్నారని వివరించారు. కేవలం కొన్ని మండలాలకే పరిమితం కాకుండా వాస్తవ పరిస్థితులను క్షేత్రస్థాయిలో పరిశీలించి అర్హత ఉన్న అన్ని మండలాలకు కరువు మండలాల హోదా కల్పించాలని కోరారు.

తీవ్ర వర్షాభావ పరిస్థితుల నేపథ్యంలో తమ ప్రాంతాలను కరువు మండలాలుగా ప్రకటించాలని కోరుతూ, ఆయా మండలాల పరిధిలోని గ్రామాల్లో ప్రజలు, రైతులు స్వచ్ఛందంగా ముందుకు వచ్చి ఏకగ్రీవ తీర్మానాలు చేస్తున్నారని మంత్రి తెలిపారు. ప్రజల నుంచి వస్తున్న విజ్ఞప్తులు, గ్రామాల్లో నెలకొన్న పరిస్థితులు, రైతులు ఎదుర్కొంటున్న ఇబ్బందులను ప్రభుత్వం పరిగణనలోకి తీసుకోవాలని కోరారు. కరువు మండలాలుగా గుర్తించడం ద్వారా బాధిత రైతులకు ప్రభుత్వ పరంగా అవసరమైన సహాయ సహకారాలు అందించేందుకు అవకాశం ఉంటుందని, వ్యవసాయ రంగానికి ఊరట కల్పించడంతో పాటు గ్రామీణ ప్రజలకు ఎదురయ్యే ఇబ్బందులను తగ్గించేందుకు చర్యలు చేపట్టవచ్చని పేర్కొన్నారు. ఈ నేపథ్యంలో జిల్లా పరిధిలోని హుస్నాబాద్, కోహెడ, అక్కన్నపేట మండలాల్లో నెలకొన్న వర్షాభావ పరిస్థితులను పరిగణనలోకి తీసుకుని, వాటిని కూడా కరువు మండలాలుగా ప్రకటించాలని మంత్రి పొన్నం ప్రభాకర్ ముఖ్యమంత్రి రేవంత్ రెడ్డిని కోరారు. రైతుల ప్రయోజనాలను దృష్టిలో ఉంచుకుని ప్రభుత్వం సానుకూలంగా స్పందించి తగిన నిర్ణయం తీసుకోవాలని విజ్ఞప్తి చేశారు.