రైతుల సంక్షేమమే కాంగ్రెస్ ప్రభుత్వ ప్రధాన లక్ష్యమని, వారి సమస్యల పరిష్కారానికి ప్రభుత్వం కట్టుబడి ఉందని కొమురవెల్లి దేవస్థానం చైర్మన్ గంగం నరసింహారెడ్డి అన్నారు. మండలంలో పంటలు ఎండిపోతున్నాయని రైతుల నుంచి అందిన విజ్ఞప్తి మేరకు, వెల్దండ రిజర్వాయర్ నుండి గోదావరి జలాలను కాలువల ద్వారా విడుదల చేశారు.
జనగామ నియోజకవర్గ కాంగ్రెస్ పార్టీ ఇంచార్జ్ కొమ్మూరి ప్రతాపరెడ్డి ఆదేశాల మేరకు, మండలంలోని వెల్దండ రిజర్వాయర్ నుండి నర్మేట, అమలాపురం, తరిగొప్పుల గ్రామాలకు గోదావరి జలాలను కాలువల ద్వారా విడుదల చేయడం జరిగింది. ఈ చర్యతో ఎండిపోతున్న పంటలకు జీవం పోయనుంది.
కొమురవెల్లి దేవస్థానం చైర్మన్ గంగం నరసింహారెడ్డి మాట్లాడుతూ, ఈ ప్రాంత అభివృద్ధిపై ప్రత్యేక శ్రద్ధతో రిజర్వాయర్లకు తన సొంత నిధులతో ప్రణాళికలు తయారు చేసిన కొమ్మూరి ప్రతాపరెడ్డి ఆదేశాలతోనే నీటి విడుదల జరిగిందని తెలిపారు. కాంగ్రెస్ ప్రభుత్వ స్పందన తక్షణమే ఉందని ఆయన పేర్కొన్నారు.
ఈ నీటి విడుదలతో రైతుల కష్టాలు తీరనున్నాయని, సకాలంలో పంటలు చేతికి వస్తాయని ఆయన ఆశాభావం వ్యక్తం చేశారు. రైతుల సంక్షేమానికి ప్రభుత్వం అన్ని విధాలా అండగా ఉంటుందని హామీ ఇచ్చారు. ఈ కార్యక్రమంలో పలువురు పార్టీ నాయకులు పాల్గొన్నారు.
