నార్కెట్ పల్లి వారాంతపు సంత వేలం రూ. 50.51 లక్షలకు ఖరారు

నార్కెట్ పల్లిలో నిర్వహించిన వారాంతపు సంత వేలం పాట రూ. 50.51 లక్షలకు ముగిసింది. ఈ వేలం ప్రక్రియ బుధవారం పోలీసుల రంగప్రవేశంతో ప్రశాంతంగా జరిగింది. గతంలో నాలుగు సార్లు వాయిదా పడిన ఈ ప్రక్రియ, చివరికి రూ. 50.51 లక్షలకు ఖరారైంది.

స్థానిక ఎస్సై డి. నరేష్ టెండర్దారులకు సూచనలు చేస్తూ, ప్రజాస్వామ్యంలో ఎవరికైనా టెండర్ పాడే హక్కు ఉందని, శాంతియుతంగా నిర్వహించుకోవాలని సూచించారు. అనంతరం అధికారులు టెండర్ ప్రక్రియను కొనసాగించగా, నార్కెట్ పల్లికి చెందిన తెల్సూరి నరసింహులు అత్యధికంగా రూ. 50.51 లక్షలు పలికి టెండర్ దక్కించుకున్నారు.

గ్రామ పంచాయతీకి రావలసిన ఆదాయం గతంతో పోలిస్తే రూ. 2.42 లక్షలు తక్కువగా ఉన్నప్పటికీ, సిండికేట్ వ్యాపారులు ఊహించిన దానికంటే రూ. 15 లక్షలకు పైగా ఎక్కువ మొత్తానికి టెండర్ దారులు పాల్గొనడం అధికారులకు ఊరటనిచ్చింది. ప్రభుత్వం గత ఏడాది ఈ అంగడి వేలం పాటను రూ. 52.93 లక్షలకు ఖరారు చేయగా, ఈసారి కొంత మేరకు తగ్గింది.

అప్సెట్ ధర రానందున జిల్లా కలెక్టర్, డిపిఓలు తుది నిర్ణయంగా రూ. 50.51 లక్షలకు ఖరారు చేశారు. ఈ కార్యక్రమంలో సర్పంచ్ బొల్లం ఉమారాణి, ఉపసర్పంచ్ ద్యావరి యాకయ్య, కార్యదర్శి బాల కిషన్ తదితరులు పాల్గొన్నారు.