జనగామ పట్టణంలో జరగనున్న వినాయక నిమజ్జన కార్యక్రమానికి మున్సిపల్ అధికారులు పకడ్బందీ ఏర్పాట్లు చేస్తున్నారు. ఇందులో భాగంగా బుధవారం మున్సిపల్ చైర్పర్సన్ కడకంచి బాలమణి శ్రీనివాస్, కమిషనర్ రాజశేఖర్రెడ్డి కలిసి నెల్లుట్ల చెరువు వద్ద ఏర్పాట్లను పరిశీలించి అధికారులకు సూచనలు చేశారు.
జనగామ పట్టణ ప్రజల మనోభావాలను దృష్టిలో ఉంచుకుని వినాయక నిమజ్జన ఏర్పాట్లను అత్యంత పకడ్బందీగా చేపడుతున్నట్లు చైర్పర్సన్ బాలమణి శ్రీనివాస్ తెలిపారు. నిమజ్జనానికి వచ్చే భక్తులకు ఎలాంటి అసౌకర్యం కలగకుండా అన్ని శాఖల సమన్వయంతో అవసరమైన ఏర్పాట్లు చేస్తున్నామని చెప్పారు. నిమజ్జన ప్రాంతంలో పెద్ద క్రేన్లు, లైటింగ్, బారికేడ్లను ఏర్పాటు చేస్తున్నట్లు తెలిపారు. పారిశుధ్య సమస్యలు తలెత్తకుండా మున్సిపల్ సిబ్బందితో ప్రత్యేక బృందాలను ఏర్పాటు చేసినట్లు పేర్కొన్నారు. నిమజ్జన రోజున ఎలాంటి అవాంఛనీయ సంఘటనలు చోటుచేసుకోకుండా పోలీస్ శాఖతో సమన్వయం చేసుకుని భద్రతా చర్యలు చేపడుతున్నట్లు చైర్పర్సన్ తెలిపారు. గణేష్ ఉత్సవ కమిటీల నిర్వాహకులు పోలీస్ శాఖ సూచనలు, నిబంధనలను తప్పనిసరిగా పాటిస్తూ ప్రశాంత వాతావరణంలో నిమజ్జన కార్యక్రమాన్ని నిర్వహించాలని కోరారు.
భక్తులు కూడా అధికారులకు సహకరించి నిమజ్జన కార్యక్రమాన్ని విజయవంతం చేయాలని విజ్ఞప్తి చేశారు. మున్సిపల్ కమిషనర్ రాజశేఖర్రెడ్డి మాట్లాడుతూ, చైర్పర్సన్ సూచనల మేరకు నిమజ్జనానికి అవసరమైన అన్ని ఏర్పాట్లను పూర్తి చేస్తున్నట్లు తెలిపారు. నిమజ్జన ప్రాంతంలో క్రేన్లు, లైటింగ్, బారికేడ్లు, పారిశుధ్యం తదితర ఏర్పాట్లపై ప్రత్యేక దృష్టి సారించినట్లు చెప్పారు. సంబంధిత శాఖల అధికారులతో సమన్వయం చేసుకుంటూ నిమజ్జన కార్యక్రమం ప్రశాంతంగా జరిగేలా చర్యలు తీసుకుంటున్నామని కమిషనర్ పేర్కొన్నారు.
