నిర్వహించిన (ఓరుగల్లు న్యూస్) నవంబర్ 16
కొండపాక జిల్లా పరిషత్ బాలికల ఉన్నత పాఠశాలకు చెందిన విద్యార్థులు జి. పునీత్, టి. కార్తీక్ జిల్లా స్థాయి సాహిత్య పోటీల్లో ప్రతిభ కనబరిచి బహుమతులు సాధించారు. కథా రచనలో పునీత్, వచన కవిత్వంలో కార్తీక్ తమ సత్తా చాటారు.
సాహిత్య రంగంలోనూ కొండపాక విద్యార్థులు తమ ప్రతిభను చాటుకున్నారు. జిల్లా స్థాయిలో నిర్వహించిన వివిధ సాహిత్య పోటీల్లో పాల్గొని బహుమతులు సాధించి పాఠశాలకు, గ్రామానికి గర్వకారణంగా నిలిచారు. సుగుణ సాహితీ సమితి ఆధ్వర్యంలో నిర్వహించిన జిల్లా స్థాయి ఉగాది బాలల కథల పోటీల్లో కొండపాక జిల్లా పరిషత్ బాలికల ఉన్నత పాఠశాలకు చెందిన తొమ్మిదో తరగతి విద్యార్థి జి. పునీత్ పాల్గొని, తాను స్వయంగా రచించిన నాన్న మనసు కథకు ప్రోత్సాహక బహుమతిని అందుకున్నాడు. అలాగే తెలంగాణ సారస్వత పరిషత్ ఆధ్వర్యంలో బాలల దినోత్సవం సందర్భంగా నిర్వహించిన వచన కవిత్వ పోటీల్లో పదో తరగతి విద్యార్థి టి. కార్తీక్ తన కలం నుంచి జాలువారిన టీచరమ్మ అనే వచన కవితతో ప్రథమ బహుమతిని కైవసం చేసుకున్నాడు.
ఒకరు కథా రచనలో, మరొకరు వచన కవిత్వంలో ప్రతిభ కనబరిచి సాహిత్య రంగంలో తమదైన ముద్ర వేశారు. విద్యార్థుల్లో దాగి ఉన్న సృజనాత్మకత, రచనా నైపుణ్యం, భావవ్యక్తీకరణ సామర్థ్యానికి ఈ విజయాలు నిదర్శనంగా నిలిచాయి. విద్యార్థులు చదువుతోపాటు సాహిత్య రంగంలోనూ రాణించడం పట్ల పాఠశాల ప్రధానోపాధ్యాయులు బి. విఠల్ నాయక్, ఉపాధ్యాయులు హర్షం వ్యక్తం చేశారు. విద్యార్థుల్లోని ప్రతిభను గుర్తించి ప్రోత్సహిస్తే భవిష్యత్తులో మరింత మంది యువ రచయితలు, కవులు ఎదిగే అవకాశం ఉంటుందని పేర్కొన్నారు. ఈ విజయాలు ఇతర విద్యార్థులకు సైతం స్ఫూర్తినిస్తాయని, భవిష్యత్తులో మరిన్ని విజయాలు సాధించి పాఠశాలకు, గ్రామానికి మంచి పేరు తీసుకురావాలని ఆకాంక్షించారు.


