సిద్దిపేట జిల్లా కుకునూరుపల్లి మండల కేంద్రంలోని గ్రామ వేపచెట్టు హనుమాన్ దేవాలయ ప్రాంగణంలో కార్తీక మాసం క్షీరాబ్ధి ద్వాదశిని పురస్కరించుకొని తులసీ దామోదర కళ్యాణం, సామూహిక దీపోత్సవ కార్యక్రమాన్ని ఘనంగా నిర్వహించారు. ఈ కార్యక్రమంలో గ్రామ భక్తులు, గజ్వేల్ సేవా సమితి సభ్యులు, కుకునూరుపల్లి గ్రామ ఆర్యవైశ్య మహిళా విభాగం సభ్యులు, ఆర్యవైశ్య సంఘం సభ్యులతో పాటు వివిధ కులాలకు చెందిన భక్తులు పెద్ద సంఖ్యలో పాల్గొని వేడుకలను భక్తిశ్రద్ధలతో నిర్వహించారు.
ఈ కార్యక్రమాన్ని కాసం నవీన్ కుమార్ కుటుంబ సభ్యులు, ఉప్పల పాండురంగం, గ్రామ భక్తుల సహకారంతో ఘనంగా నిర్వహించారు. తులసీ దామోదర కళ్యాణం అనంతరం ఆలయ ప్రాంగణంలో సామూహిక దీపోత్సవం నిర్వహించడంతో ఆధ్యాత్మిక వాతావరణం నెలకొంది.
అర్చకుల సందేశం
ఈ సందర్భంగా దేవాలయ అర్చకులు వెంకటరమణ, కార్తీక మాస విశిష్టత, క్షీరాబ్ధి ద్వాదశి ప్రాముఖ్యత, తులసీ దామోదర కళ్యాణం యొక్క ఆధ్యాత్మిక విశిష్టతను భక్తులకు వివరించారు. కార్తీక మాసంలో దీపారాధన, భగవంతుని నామస్మరణ, ఆలయ సందర్శన చేయడం ఎంతో పుణ్యప్రదమని తెలిపారు.
ప్రతి ఒక్కరూ సనాతన ధర్మాన్ని పాటిస్తూ ఆధ్యాత్మిక చింతనతో జీవించాలని, వీలైతే ప్రతిరోజూ దేవాలయాలను సందర్శించాలని, లేదంటే వారంలో కనీసం ఒక్కరోజైనా ఆలయానికి వెళ్లి భక్తి మార్గంలో నడవాలని సూచించారు.
తల్లిదండ్రులు తమ పిల్లలకు సనాతన ధర్మం, సంప్రదాయాలు, కట్టుబొట్టు పద్ధతుల పట్ల అవగాహన కల్పిస్తూ మంచి సంస్కారాలతో పెంచాలని, ధర్మబద్ధమైన జీవన విధానాన్ని అలవాటు చేయాలని అర్చకులు భక్తులకు సందేశం ఇచ్చారు.
కార్యక్రమంలో పాల్గొన్న భక్తులందరూ తులసీ దామోదర స్వామివారి కళ్యాణాన్ని దర్శించుకొని, సామూహిక దీపోత్సవంలో పాల్గొని భక్తి పారవశ్యంలో మునిగిపోయారు.


