ఓరుగల్లు న్యూస్ 2027 సంక్రాంతికి పా. రంజిత్ వెట్టువం.. పాన్ ఇండియా విడుదల

ప్రముఖ తమిళ దర్శకుడు పా. రంజిత్ తెరకెక్కిస్తున్న భారీ యాక్షన్ చిత్రం వెట్టువం విడుదల తేదీ ఖరారైంది. 2027 సంక్రాంతి సందర్భంగా ఈ సినిమాను ప్రపంచవ్యాప్తంగా థియేటర్లలో విడుదల చేయనున్నట్లు చిత్రబృందం ప్రకటించింది. ఈ సందర్భంగా కొత్త పోస్టర్ను కూడా విడుదల చేసింది. హీరో ఆర్య ప్రధాన పాత్రలో నటిస్తున్న ఈ సినిమాలో శోభిత ధూళిపాళ, కలైయరసన్ తదితరులు కీలక పాత్రలు పోషిస్తున్నారు.

భూమి ఆధిపత్యం కోసం పోరాటాలు

గతంలో జరిగిన సంఘర్షణల ప్రభావం ప్రస్తుత సమాజంపై ఎలా ఉంటుందనే అంశాలతో ఈ సినిమా కథనం సాగనుంది. వివిధ వర్గాల మధ్య భూమి ఆధిపత్యం కోసం జరిగే పోరాటాలు, అధికారాన్ని దక్కించుకునేందుకు సాగే ఘర్షణలు ప్రధానంగా ఉండనున్నాయి. భారీ యాక్షన్ సన్నివేశాలతో పాటు సామాజిక అంశాలను కూడా దర్శకుడు ఇందులో చూపించనున్నారు.

సంప్రదాయ యుద్ధకళలతో యాక్షన్ సన్నివేశాలు

ఈ సినిమాలో తమిళ సంప్రదాయ యుద్ధకళ అయిన అడిమురైతో పాటు మల్లఖంబ్ క్రీడకు సంబంధించిన సన్నివేశాలను ప్రత్యేకంగా రూపొందించారు. వీటి కోసం ప్రధాన నటీనటులు ప్రత్యేక శిక్షణ తీసుకున్నారు. శారీరకంగా సవాలుతో కూడిన పోరాట సన్నివేశాలు ప్రేక్షకులకు కొత్త అనుభూతిని అందించేలా చిత్రీకరించినట్లు చిత్రబృందం వెల్లడించింది.

ఐదు భాషల్లో విడుదల

వెట్టువం చిత్రంలో ఆర్య, శోభిత ధూళిపాళ, కలైయరసన్, వీఆర్ దినేశ్, షబీర్ కల్లారక్కల్, మైమ్ గోపి, గురు సోమసుందరం, జాన్ విజయ్తో పాటు పలువురు నటిస్తున్నారు. ఈ చిత్రానికి జి.వి. ప్రకాశ్ కుమార్ సంగీతం అందిస్తున్నారు. రూపేశ్ షాజీ సినిమాటోగ్రఫీ బాధ్యతలు నిర్వహిస్తున్నారు. దిలీప్ సుబ్బరాయన్ యాక్షన్ సన్నివేశాలను రూపొందిస్తున్నారు.

నీలం ప్రొడక్షన్స్, లెర్న్ అండ్ టీచ్ ప్రొడక్షన్ సంస్థలు సంయుక్తంగా ఈ సినిమాను నిర్మిస్తున్నాయి. పా. రంజిత్ స్వయంగా దర్శకత్వం వహిస్తున్నారు.

ఇప్పటికే విడుదలైన వరల్డ్ ఆఫ్ వెట్టువం పరిచయ వీడియో ప్రేక్షకుల్లో ఆసక్తిని రేకెత్తించింది. ఈ వీడియోకు వివిధ భాషల్లో ప్రముఖ నటులు వాయిస్ ఓవర్ అందించారు. తెలుగు వెర్షన్కు రానా దగ్గుబాటి, హిందీకి పంకజ్ త్రిపాఠి, కన్నడకు కిచ్చా సుదీప్, మలయాళానికి సౌబిన్ షాహిర్ వాయిస్ అందించగా.. తమిళ వెర్షన్కు పా. రంజిత్ స్వయంగా వాయిస్ ఇచ్చారు.

కబాలి, కాలా, సర్పట్ట పరంబరై, తంగలాన్ వంటి సినిమాలతో గుర్తింపు పొందిన పా. రంజిత్ నుంచి వస్తున్న ఈ చిత్రం తమిళం, తెలుగు, హిందీ, మలయాళం, కన్నడ భాషల్లో విడుదల కానుంది. 2027 సంక్రాంతికి ఈ సినిమా ప్రేక్షకుల ముందుకు రానుంది.