హైదరాబాద్లో అక్రమ పేకాట కార్యకలాపాలపై పోలీసులు మరోసారి దాడులు నిర్వహించారు. వట్టేపల్లిలోని ఓ ఫామ్హౌస్లో పేకాట నిర్వహిస్తున్నారనే సమాచారంతో మెయిలార్దేవ్పల్లి పోలీసులు సోమవారం తెల్లవారుజామున తనిఖీలు చేపట్టారు. ఈ దాడిలో పేకాట ఆడుతున్న తొమ్మిది మందిని పట్టుకున్నారు.
పోలీసుల వివరాల ప్రకారం.. గుంటల్ షా బాబా దర్గా సమీపంలోని ఫామ్హౌస్లో పేకాట జరుగుతున్నట్లు సమాచారం అందింది. దీంతో పోలీసులు అక్కడికి చేరుకుని దాడి చేశారు. ఈ సందర్భంగా రూ.9,30,620 నగదుతో పాటు ఆరు మొబైల్ ఫోన్లు, ఆరు సెట్ల పేకముక్కలను స్వాధీనం చేసుకున్నారు.
నిర్వాహకులపై కేసు నమోదు
పోలీసుల ప్రాథమిక సమాచారం ప్రకారం.. ఖదీర్, షిలా అలియాస్ సామ్ అనే వ్యక్తులు పేకాట నిర్వహణలో కీలకంగా వ్యవహరిస్తున్నట్లు గుర్తించారు. ఆటలో పాల్గొన్న వారి నుంచి 10 శాతం కమీషన్ వసూలు చేస్తున్నట్లు పోలీసులు తెలిపారు. ఈ ఘటనపై కేసు నమోదు చేసి దర్యాప్తు చేపట్టారు.


