జనగామ జిల్లా, దేవరుప్పుల మండలం లకావత్ తండా గ్రామ పంచాయతీ పరిధిలో ఉన్న శ్రీ వానకొండయ్య లక్ష్మి నరసింహ స్వామి పుణ్యక్షేత్రం వద్ద జరుగుతున్న మైనింగ్ కార్యకలాపాలను తక్షణమే నిలిపివేయాలని, మైనింగ్ పర్మిషన్ ను రద్దు చేయాలని బీఆర్ఎస్ నాయకులు డిమాండ్ చేశారు. ఈ మైనింగ్ పనులు పుణ్యక్షేత్రం ఉనికికే ప్రమాదకరమని వారు ఆందోళన వ్యక్తం చేశారు.
మాజీ మంత్రి ఎర్రబెల్లి దయాకర్ రావు ఆధ్వర్యంలో దేవరుప్పుల మండల బీఆర్ఎస్ బృందం జనగామ జిల్లా కలెక్టర్ సందీప్ కుమార్ ఘా ను కలిసి ఈ మేరకు ఒక మెమోరాండం సమర్పించారు. గుట్టపై జరుగుతున్న మైనింగ్ కార్యకలాపాలు పవిత్ర పుణ్యక్షేత్రం యొక్క పరిసరాలను, దేవాలయ నిర్మాణాన్ని దెబ్బతీస్తున్నాయని, దీనివల్ల దేవాలయం ఉనికి కోల్పోయే ప్రమాదం ఉందని వారు కలెక్టర్ దృష్టికి తీసుకువచ్చారు.
గత బీఆర్ఎస్ ప్రభుత్వ హయాంలో, దేవాలయ పరిరక్షణ కోసం మైనింగ్ పర్మిషన్ ను రద్దు చేయించామని, రూ. 2 కోట్లతో దేవాలయ అభివృద్ధి పనులు కూడా చేపట్టామని ఎర్రబెల్లి దయాకర్ రావు గుర్తు చేశారు. ప్రస్తుత కాంగ్రెస్ ప్రభుత్వం అధికారంలోకి వచ్చాక, అప్పటి అనుమతులను రద్దు చేసి, తిరిగి మైనింగ్ పనులను ప్రారంభించడం దురదృష్టకరమని ఆయన విమర్శించారు. బీఆర్ఎస్ నాయకులు పనులను అడ్డుకోవడానికి ప్రయత్నిస్తే, వారిపై కేసులు పెట్టి వేధిస్తున్నారని ఆరోపించారు.
వానకొండయ్య గుట్ట వద్ద మైనింగ్ పనులు ఆపకపోతే, బీఆర్ఎస్ పార్టీ ఆధ్వర్యంలో పెద్ద ఎత్తున ఉద్యమం చేపడతామని నాయకులు హెచ్చరించారు. ఈ సందర్భంగా, పాలకుర్తి, కొడకండ్ల, దేవరుప్పుల మండలాల్లోని ధాన్యం కొనుగోలు కేంద్రాల్లో ఉన్న ధాన్యాన్ని ప్రభుత్వం సత్వరమే కొనుగోలు చేయాలని, మాదాపురం గ్రామంలోని ఎస్సీ కాలనీలో 30 డబుల్ బెడ్ రూమ్ ఇళ్ల మూడవ విడత బిల్లులు మంజూరు చేయాలని కూడా వారు ప్రభుత్వాన్ని కోరారు.
