ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయానికి చెందిన వ్యవసాయ కళాశాల అగ్రోనమీ అసోసియేట్ డీన్ డా. ఎం. గోవర్ధన్ను అవినీతి నిరోధక శాఖ (ఏసీబీ) అధికారులు సోమవారం అరెస్ట్ చేశారు. సీడ్ లైసెన్స్ జారీ చేసేందుకు, అలాగే వ్యవసాయ శాఖ నుంచి ఎటువంటి ఇబ్బందులు రాకుండా చూసేందుకు ఫిర్యాదుదారుడి నుంచి రూ. 1,00,000 లంచం తీసుకుంటుండగా ఆయన పట్టుబడ్డారు.
ఏసీబీ అధికారుల కథనం ప్రకారం, డా. గోవర్ధన్ గతంలో కూడా ఫిర్యాదుదారుడి నుంచి రూ. 25,000 లంచం స్వీకరించినట్లు విచారణలో తేలింది. సోమవారం రూ. 1,00,000 లంచం డబ్బును తీసుకుంటుండగా ఏసీబీ అధికారులు రెడ్ హ్యాండెడ్గా పట్టుకున్నారు.
అధికారులు వెంటనే నగదును స్వాధీనం చేసుకున్నారు. డా. గోవర్ధన్ చేతులకు నిర్వహించిన కెమికల్ టెస్టులో లంచం తీసుకున్నట్లు పాజిటివ్ ఫలితాలు రావడంతో అరెస్ట్ చేశారు. ఈ సంఘటన వ్యవసాయ రంగంలో కలకలం రేపింది.
అరెస్ట్ అయిన అసోసియేట్ డీన్ను నాంపల్లిలోని ప్రత్యేక న్యాయస్థానంలో హాజరుపరిచేందుకు అధికారులు ఏర్పాట్లు చేస్తున్నారు. ఈ కేసుపై సమగ్ర దర్యాప్తు జరుగుతోందని, మరిన్ని వివరాలు వెల్లడి కావాల్సి ఉందని తెలిపారు. ఫిర్యాదు చేసిన వ్యక్తి వివరాలను గోప్యంగా ఉంచుతున్నారు.
