ఆంధ్రప్రదేశ్లో వైద్య ఆరోగ్య శాఖ కాంట్రాక్ట్ ఉద్యోగులు తమ సమస్యల పరిష్కారం కోరుతూ మంగళవారం నుంచి సమ్మె ప్రారంభించారు. దీంతో రాష్ట్రంలోని ప్రభుత్వ ఆసుపత్రులు, ప్రాథమిక ఆరోగ్య కేంద్రాల్లో వైద్య సేవలపై ప్రభావం పడే పరిస్థితి నెలకొంది. ఉద్యోగులను క్రమబద్ధీకరించాలని, ఇతర సమస్యలు పరిష్కరించాలని సంఘాలు డిమాండ్ చేస్తున్నాయి.
రాష్ట్రవ్యాప్తంగా పలు జిల్లాల్లో స్టాఫ్ నర్సులు, ల్యాబ్ టెక్నీషియన్లు, ఫార్మసిస్టులు, ఇతర కాంట్రాక్ట్ సిబ్బంది విధులను బహిష్కరించారు. ఏలూరు జిల్లాలో తొలిరోజు సుమారు 123 మంది కాంట్రాక్ట్ సిబ్బంది సమ్మెలో పాల్గొన్నట్లు అధికారులు తెలిపారు. బుధవారం నుంచి మరింత మంది పూర్తిస్థాయిలో విధులకు దూరంగా ఉండనున్నట్లు ఉద్యోగ సంఘాలు ప్రకటించాయి.
తమ డిమాండ్లపై ప్రభుత్వం నుంచి స్పష్టమైన హామీ లభించకపోవడంతోనే సమ్మెకు వెళ్లినట్లు ఉద్యోగ సంఘాల ప్రతినిధులు తెలిపారు. కాంట్రాక్ట్ ఉద్యోగులను క్రమబద్ధీకరించడంతో పాటు తమకు సంబంధించిన ఇతర సమస్యలను పరిష్కరించాలని వారు కోరుతున్నారు.
సమ్మె ప్రభావంతో అత్యవసర వైద్య సేవలకు అంతరాయం కలగకుండా రాష్ట్ర వైద్య ఆరోగ్య శాఖ ప్రత్యామ్నాయ ఏర్పాట్లు చేసింది. అత్యవసర విభాగాలు, ఐసీయూలు, ప్రసూతి, శస్త్రచికిత్స సేవలు 24 గంటలూ కొనసాగించేలా ఆసుపత్రుల అధికారులకు ఆదేశాలు జారీ చేసింది.
అవసరమైన చోట రెగ్యులర్ సిబ్బందిని ఇతర విభాగాల నుంచి కీలక సేవలకు మళ్లించడంతో పాటు మిడ్ లెవల్ హెల్త్ ప్రొవైడర్లు, శిక్షణ పొందిన సిబ్బందిని వినియోగించాలని సూచించింది. మందులు, ఆక్సిజన్, రక్త నిల్వలు, విద్యుత్ బ్యాకప్, అంబులెన్స్ సేవలకు ఎలాంటి అంతరాయం జిల్లా కలెక్టర్లు, ఆసుపత్రుల అధికారులు పర్యవేక్షించాలని ప్రభుత్వం ఆదేశించింది.
సమ్మె కారణంగా రోగులకు ఇబ్బందులు తలెత్తకుండా ప్రత్యామ్నాయ సిబ్బందితో వైద్య సేవలను కొనసాగించేందుకు చర్యలు చేపట్టినట్లు అధికారులు తెలిపారు. ఈ సమ్మె వైద్య సేవలపై తీవ్ర ప్రభావం చూపే అవకాశం ఉంది.
