కుత్బుల్లాపూర్, 2026-11-22
సూరారం శ్రీకృష్ణ నగర్లో నూతన కమిటీ హాల్ ప్రారంభోత్సవ కార్యక్రమం తీవ్ర ఉద్రిక్తతకు దారితీసింది. ప్రభుత్వ ప్రోటోకాల్కు విరుద్ధంగా కార్యక్రమం నిర్వహిస్తున్నారంటూ కాంగ్రెస్ కార్యకర్తలు అడ్డుకోవడంతో అక్కడ కొంతసేపు గందరగోళ పరిస్థితులు నెలకొన్నాయి. కమిటీ హాల్ శిలాఫలకంపై ముఖ్యమంత్రి రేవంత్ రెడ్డి, ఇన్చార్జ్ మంత్రి శ్రీధర్ బాబు పేర్లు లేకపోవడంపై కాంగ్రెస్ నాయకులు అభ్యంతరం వ్యక్తం చేశారు.
పంచాయతీరాజ్ శాఖ నిధులతో చేపట్టిన పనులకు పాత శిలాఫలకాలను ఉపయోగించడం ఏమిటని ప్రశ్నించారు. ప్రభుత్వ నిధులతో చేపట్టిన అభివృద్ధి పనుల శిలాఫలకంపై బీఆర్ఎస్ నాయకుల పేర్లు ఎందుకు ఉంచారని ఆగ్రహం వ్యక్తం చేస్తూ ఆందోళనకు దిగారు. ఈ క్రమంలో ఇరువర్గాల నాయకులు, కార్యకర్తల మధ్య తీవ్ర వాగ్వాదం చోటుచేసుకోవడంతో పరిస్థితి ఉద్రిక్తంగా మారింది.
పోలీసుల జోక్యంతో సద్దుమణిగిన వాతావరణం
సమాచారం అందుకున్న సూరారం పోలీసులు వెంటనే ఘటనా స్థలానికి చేరుకుని ఇరువర్గాలను చెదరగొట్టి పరిస్థితిని అదుపులోకి తీసుకొచ్చారు. అనంతరం శిలాఫలకాలను తొలగించాలని సంబంధిత డీఈకి సూచించిన పోలీసులు, ఇరువర్గాలకు నచ్చజెప్పి అక్కడి నుంచి పంపించారు. దీంతో కొంతసేపు కొనసాగిన ఉద్రిక్తతకు తెరపడింది.







