జయశంకర్ భూపాలపల్లి జిల్లా కోర్టులో ఏసీబీ దాడులు: ముగ్గురు సిబ్బంది లంచం తీసుకుంటూ పట్టుబడ్డారు

జిల్లా కోర్టులో లంచం వ్యవహారం వెలుగులోకి రావడంతో ఏసీబీ అధికారులు వెంటనే స్పందించి ఈ దాడులు చేపట్టారు. పట్టుబడిన వారిలో స్టెనోగ్రాఫర్ పాలకుర్తి సాయి చరణ్, కోర్టు సిబ్బంది పున్నం రజిత, కొమ్ము సునీతలు ఉన్నట్లు అధికారులు తెలిపారు.

బాధితుడు సిహెచ్ గోపాలరావు తమకు అవసరమైన సర్టిఫైడ్ కాపీని అందించడానికి కోర్టు సిబ్బంది లంచం అడిగారని ఏసీబీ అధికారులకు ఫిర్యాదు చేశారు. ఈ ఫిర్యాదు ఆధారంగా ఏసీబీ అధికారులు చాకచక్యంగా వ్యవహరించి, లంచం తీసుకుంటుండగా వారిని రెడ్ హ్యాండెడ్‌గా పట్టుకున్నారు.

అరెస్ట్ అయిన ముగ్గురు కోర్టు సిబ్బందిపై అవినీతి నిరోధక చట్టం కింద కేసు నమోదు చేసి, విచారణ ప్రారంభించారు. ఈ సంఘటన జిల్లా న్యాయ వ్యవస్థలో కలకలం సృష్టించింది. ఏసీబీ అధికారులు ఈ కేసులో మరింత లోతుగా దర్యాప్తు చేస్తున్నారు.