వరంగల్, 2026-11-22
త్రిపుర గవర్నర్ నల్లు ఇంద్రసేనారెడ్డి హన్మకొండలో పర్యటించి, అనారోగ్యంతో ఉన్న డాక్టర్ విఠల్ రెడ్డిని పరామర్శించారు. మాజీ ఎమ్మెల్యే వన్నాల శ్రీరాములు ఏర్పాటు చేసిన తేనీటి విందులో పాల్గొని, బీజేపీ నాయకులతో సమావేశమయ్యారు.
త్రిపుర రాష్ట్ర గవర్నర్, మలక్పేట మాజీ శాసనసభ్యులు నల్లు ఇంద్రసేనారెడ్డి హన్మకొండలో సుడిగాలి పర్యటన చేశారు. రాష్ట్రీయ స్వయంసేవక్ సంఘ్ (ఆర్ఎస్ఎస్) కార్యకర్త, ఏబీవీపీ పూర్వ నాయకులు, గాంధీ మెడికల్ కాలేజీ స్టూడెంట్ యూనియన్ నాయకుడిగా పనిచేసిన ప్రముఖ సర్జన్ డాక్టర్ విఠల్ రెడ్డి కొంతకాలంగా అనారోగ్యంతో బాధపడుతున్నారు. ఈ విషయం తెలుసుకున్న త్రిపుర గవర్నర్ ఇంద్రసేనారెడ్డి హన్మకొండలోని డాక్టర్ విఠల్ రెడ్డి నివాసానికి చేరుకుని ఆయనను పరామర్శించారు. డాక్టర్ విఠల్ రెడ్డి ఆరోగ్య పరిస్థితిని అడిగి తెలుసుకుని, ఆయన త్వరగా కోలుకోవాలని ఆకాంక్షించారు. ఈ పర్యటనలో భాగంగా గవర్నర్ పలువురు బీజేపీ సీనియర్ నాయకులను కలిశారు. వర్ధన్నపేట మాజీ శాసనసభ్యులు వన్నాల శ్రీరాములు ఏర్పాటు చేసిన ప్రత్యేక తేనీటి విందుకు నల్లు ఇంద్రసేనారెడ్డి ముఖ్య అతిథిగా హాజరయ్యారు. ఈ సందర్భంగా పార్టీ సీనియర్ నేతలు, పాత మిత్రులతో ఆయన ఆప్యాయంగా ముచ్చటించి, పలు సమకాలీన అంశాలపై అభిప్రాయాలు పంచుకున్నారు.
గవర్నర్ పర్యటనలో మాజీ ఎమ్మెల్యేలు తక్కెళ్లపెళ్లి రాజేశ్వర్ రావు, మార్తినేని ధర్మారావు, కొండేటి శ్రీధర్, మాజీ లోక్సభ సభ్యులు అజ్మీరా సీతారామ్ నాయక్ పాల్గొన్నారు. వీరితో పాటు బీజేపీ సీనియర్ నాయకులు మంద అయిలయ్య, వంగాల సమ్మిరెడ్డి, ఎడ్ల అశోక్ రెడ్డి, నాగపురి రాజమౌళి, కుసుమ సతీష్, ఎర్రబెల్లి ప్రదీప్ రావు, బీజేపీ అధికార ప్రతినిధులు డాక్టర్ వన్నాల వెంకటరమణ, చందుపట్ల కీర్తి రెడ్డి, మాజీ లోక్సభ సభ్యులు దివంగత చందుపట్ల జంగారెడ్డి తనయుడు సత్యపాల్ రెడ్డి, వరంగల్ జిల్లా బీజేపీ అధ్యక్షులు గంట రవికుమార్ తదితరులు గవర్నర్తో ఉన్నారు. అనంతరం మాజీ ఎమ్మెల్యే వన్నాల శ్రీరాములు సతీమణి మరణించడంతో, దివంగత వన్నాల విజయలక్ష్మీ చిత్రపటానికి పూలు సమర్పించి నివాళులర్పించారు.







