జనగామ జిల్లా నర్మెట్ట మండలంలోని ఇప్పలగడ్డ గ్రామంలో శ్రీ శ్రీ శ్రీ సంత్ సద్గురు సేవాలాల్ మహారాజ్ 287వ జయంతిని గ్రామ సర్పంచ్ ధారావత్ రాజమణి, LHPS జిల్లా నాయకులు ధారవత్ రాజు నాయక్ ఆధ్వర్యంలో ఘనంగా నిర్వహించారు. ఈ సందర్భంగా సేవాలాల్ మహారాజ్ చిత్రపటానికి పూలమాలలు సమర్పించి, భోగ్ బండార్ కార్యక్రమాన్ని చేపట్టారు.
LHPS జిల్లా నాయకులు ధారవత్ రాజు నాయక్ మాట్లాడుతూ, సేవాలాల్ మహారాజ్ బంజారా సమాజానికి ఆధ్యాత్మిక గురువుగా, సామాజిక సంస్కర్తగా కీలక పాత్ర పోషించారని తెలిపారు. ఆయన 1739 ఫిబ్రవరి 15న జన్మించారని, చిన్నతనం నుంచే సేవాగుణంతో ఉండేవారని వివరించారు.
సేవాలాల్ మహారాజ్ బంజారా సమాజంలో అనేక సంస్కరణలు ప్రవేశపెట్టారని, దురాచారాలకు వ్యతిరేకంగా పోరాడారని, సమాజాన్ని సంఘటితం చేసి హక్కుల కోసం కృషి చేశారని ఆయన పేర్కొన్నారు. ఆయన 1806లో మరణించారు.
ఈ జయంతి వేడుకల్లో గ్రామ సర్పంచ్, LHPS నాయకులతో పాటు పలువురు గ్రామస్తులు, వార్డు సభ్యులు, మహారాజ్ లు పాల్గొన్నారు. సేవాలాల్ మహారాజ్ జీవితాన్ని, బోధనలను స్మరించుకున్నారు.
